යුද හමුදාව ආබාධිත රණවිරුවන්ගේ කෘතිම අත් පා අලුත්වැඩියා කිරීම ආරම්භ කරයි

ආබාධිත රණවිරුවන්ගේ කෘතිම අත් පා අලුත්වැඩියා කිරීම සඳහා කුඩා පරිමාණයේ සෘජුකාරක හා අංගාදේශක විකලාංග කාර්මිකාගාර දෙකක් පසුගිය දිනක ‘අභිමන්සල - 1’ සහ ‘අභිමන්සල - 3’ හි ස්ථාපිත කර ඇත.

අනුරාධපුරය සහ කුරුණෑගල දිස්ත්‍රික්කවල පදිංචිව සිටින විශාල ප්‍රමාණයක් වන ආබාධිත රණවිරුවන්ට ඔවුන්ගේ  කෘතිම අත් පා වල සිදු කර ගත යුතු වෙනස් කිරීම් සහ අළුත්වැඩියාවන් සිදු කර ගැනීම සඳහා රාගම රණවිරු සෙවන හෝ ගාල්ල ‘සැනසුම’ වෙත නොගොස්  මෙම ඒකක මගින් එම සේවාව ලබා ගත හැකි වනු ඇත.

යුධ හමුදාධිපති ලුතිනන් ජෙනරාල් ශවේන්ද්‍ර සිල්වාගේ උපදෙස් පරිදි අනුරාධපුර ‘අභිමන්සල - 1’ සහ පාන්ගොල්ල  ‘අභිමන්සල - 3’ හි සේනාවිධායක වරුන් විසින් මෙම ඒකක දෙක එම මධ්‍යස්ථානයන්හි පිහිටුවා ඇත.

අනුරාධපුර, කුරුණෑගල , පුත්තලම, මහනුවර සහ ඒ ආශ්‍රිත ප්‍රදේශවල ආබාධිත රණවිරුවන් 12 දෙනෙකුට පළමු දින මෙම ඒකක දෙක මගින් සේවය ලබා දී ඇත.

එම ඒකක දෙක දිවයින පුරා සෑම ප්‍රදේශයකම සිටින සියලුම ආබාධිත රණවිරුවන් සඳහා විවෘතව පවතී.

මෙම අවස්ථාව සදහා අනුරාධපුර ‘අභිමන්සල -1’ සේනාවිධායක බ්‍රිගේඩියර් තුසිත හෙට්ටිආරච්චි සහ ‘අභිමන්සල -3’ හි සේනාවිධායක කර්නල් අරුණ විජේගුණවර්ධන හා තවත් පරිපාලන නිලධාරීන් කිහිපදෙනෙක් එක් වූහ.