US Institute for Security Governance (ISG) ආයතනයේ
ආරක්‍ෂක සහයෝගීතාවය අඛණ්ඩව ඉදිරියට
අගෝස්තු 29, 2025
US Institute for Security Governance (ISG) ආයතනයේ නියෝජිත පිරිසක් සහ නියෝජ්‍ය ආරක්‍ෂක අමාත්‍ය මේජර් ජෙනරල් අරුණ ජයසේකර (විශ්‍රාමික) අතර විශේෂ හමුවක් පසුගිය බදාදා (අගෝස්තු (27) දින කොළඹ Courtyard by Marriott හෝටල් පරිශ්‍රයේදී පැවැත්විණ.
ශ්‍රී ලංකාවේ සන්නද්ධ හමුදා සහ ජාතික ආරක්‍ෂාව සම්බන්ධව කටයුතු කරනු ලබන පාර්ශ්වකරුවන් සමඟ සහයෝගීතාව වර්ධනය කිරීමේ අවස්ථා ගවේෂණය කිරීමත්, එම ආයතනයේ අඛණ්ඩ මුලපිරීම් පිළිබඳ දළ විශ්ලේෂණයක් ඉදිරිපත් කිරීමත් අරමුණු කර ගනිමින් පැවැත්වෙන විශේෂ වැඩමුළුවකට සමගාමිව දෙපාර්ශවයේ ජ්‍යෙෂ්ඨ නිලධාරීන් අතර මෙම හමුව පවත්වනු ලැබීය.
මෙහිදී ආරක්‍ෂක පරිපාලනය, ආරක්‍ෂක කළමනාකරණය, මෙහෙයුම් සැළසුම් කිරීම, සම්පත් කළමනාකරණය, සයිබර් ආරක්‍ෂාව සහ වෘත්තීය හමුදා අධ්‍යාපනය ඇතුළු නවීන ආරක්‍ෂක ක්‍රියාවලීන් සහ ජාතික ආරක්‍ෂාව සඳහා වැදගත් වන ක්ෂේත්‍ර බොහොමයක් පිළිබඳ පුළුල් පරාසයක් ඔස්සේ කරුණු ආවරණය කරන ලදී.
සාකච්ඡාව සඳහා සහභාගී වූ ISG නියෝජිත කණ්ඩායම, කලාපීය ව්‍යාපෘති ප්‍රධානී Michael Charles Rembold සහ ශ්‍රී ලංකාවේ ව්‍යාපෘති සම්බන්ධීකාරක Matt Ashley විසින් මෙහෙයවනු ලැබූ අතර, ශ්‍රී ලංකාවේ ඇමරිකා එක්සත් ජනපද තානාපති කාර්යාලයේ සහකාර ආරක්‍ෂක උපදේශක Seth Nevis සහ ආරක්‍ෂක සහයෝගිතා ප්‍රධානී කාර්යාලයේ ලුතිනන් කමාන්ඩර් Ros Larry ද ඒ සඳහා සහභාගී වූහ.
එහිදී දෙපාර්ශ්වයේ නිලධාරීන් විසින් ශ්‍රී ලංකාවේ විකාශනය වන ආරක්‍ෂක ප්‍රමුඛතාවයන්හි අත්‍යවශ්‍ය අංග වශයෙන් සැලකෙන වෘත්තීයභාවය වැඩිදියුණු කිරීම, ආයතනික කාර්යක්‍ෂමතාව ඉහල නැංවීම සහ මානව ප්‍රාග්ධන සංවර්ධනයට සහාය වීම සඳහා වන කැපවීම යලිත් තහවුරු කළහ.
