ඉන්දීය ත්‍රිවිධ හමුදා දුත පිරිසක් ශ්‍රී දළඳා මාලිගාවේ සංචාරයක

ද්වීපාර්ශවික හමුදා සුහද සංචාරයක් සඳහා පසුගිය සෙනසුරාදා (15) දින දිවයිනට පැමිණි ඉන්දීය ත්‍රිවිධ හමුදා සාමාජිකයින් ඉරිදා (ජූනි 16) දින මහනුවර ශ්‍රී දලදා මාලිගාවෙහි සංචාරයක නිරත වූ බව යුද්ධ හමුදා නිල වෙබ් අඩවිය පවසයි. ඉන්දීය ත්‍රිවිධ හමුදා සාමාජිකයින් හා ඔවුන්ගේ පවුල්වල සාමාජිකයින් 159 දෙනෙකුගෙන් යුත් මෙම සංචාරකයින් පිරිස පින්නවල අලි අනාථාගාරය නැරඹීමට ද කටයුතු කළහ.

ශ්‍රී ලංකාවේ සහ ඉන්දියාවේ ත්‍රිවිධ හමුදාව අතර සහයෝගිතාව සහ අවබෝධය තවදුරටත් ශක්තිමත් කිරීම සඳහා මෙම ව්‍යාපෘතිය සංවිධානය කර ඇත. ශ්‍රී ලංකා සන්නද්ධ හමුදා සාමාජිකයින් සහ ඔවුන්ගේ පවුල්වල සාමාජිකයින් 162 දෙනෙකුගෙන් යුත් කණ්ඩායමක් සෙනසුරාදා (ජූනි 15) දින ඉන්දියාව බලා පිටත්ව ගියහ.

යුද්ධ හමුදා සාමාජිකයින් 95 ක්, නාවික හමුදා සාමාජිකයින් 32 ක් සහ ගුවන් හමුදා සාමාජිකයින් 32 දෙනෙකුගෙන් සමන්විත ඉන්දීය දූත පිරිස අඟහරුවාදා (ජූනි 18) දින ආපසු සිය රට බලා පිටත්ව යාමට නියමිත අතර දිවයිනේ රැඳී සිටින කාලය අතරතුර ස්ථාන ගණනාවකම සංචාරය කිරීමට නියමිතය.

ඉන්දියාවේ සංචාරය කරන ශ්‍රී ලංකා දූත පිරිස ඉරිදා (ජූනි 16) දින පූජනීය බුද්ධගයාව වැඳපුදා ගැනීමට නියමිතව තිබු අතර ඔවුන් එහි රැඳී සිටින කාලය තුළ තවත් ස්ථාන කිහිපයකට සංචාරය කිරීමට නියමිතය.

ශ්‍රී ලංකාවේ ඉන්දීය මහ කොමසාරිස් තරන්ජිත් සිං සිදු (HE Mr Taranjit Singh Sandhu) මැතිතුමන් සහ යුද්ධ හමුදාපති ලුතිනන් ජෙනරාල් මහේෂ් සේනානායක මහතා ද සෙනසුරාදා දින මෙරටට පැමිණෙන නියෝජිත පිරිස පිළිගැනීමට සහ මෙරටින් පිටව යන නියෝජිත පිරිසට සමුදීම සඳහා කටුනායක ජාත්‍යන්තර ගුවන් තොටුපළ වෙත පැමිණ සිටියහ.