US Institute for Security Governance ආයතනයේ නියෝජිත පිරිසක් සහ ශ්‍රී ලංකා ආරක්‍ෂක ප්‍රධානීන් අතර විශේෂ හමුවක්
ජුනි 26, 2025US Institute for Security Governance (ISG) ආයතනයේ නියෝජිත පිරිසක් ඊයේ දින (ජුනි 25) ආරක්‍ෂක නියෝජ්‍ය අමාත්‍ය මේජර් ජෙනරල් අරුණ ජයසේකර (විශ්‍රාමික) හා අද (ජුනි 26) දින ආරක්‍ෂක ලේකම් එයාර් වයිස් මාෂල් සම්පත් තුයියකොන්තා (විශ්‍රාමික) හමු වී විශේෂ සාකච්ඡාවන් හි නිරත විය.
එම අවස්ථාවන් හීදි, මෙරට ආරක්‍ෂක ක්ෂේත්‍රයේ ධාරිතාවන් සහ හමුදාමය හැකියාවන් ගොඩනැගීම පිළිබඳව ප්‍රදාන වශයෙන් අවධානය යොමු වූ අතර, ශ්‍රී ලංකාවේ සන්නද්ධ හමුදා සමඟ අනාගත සහයෝගීතාව වැඩි දියුණු කිරීම සඳහා අවශ්‍ය පූර්ව මඟ පෙන්වීමක් ලබා ගනිමින් ඒ සඳහා ISG ආයතනයෙහි අඛණ්ඩ මුලපිරීම් පිළිබඳ දළ විශ්ලේෂණයක් ඉදිරිපත් කිරීමද, සිදු විය.
සාකච්ඡා අතරතුර ආරක්‍ෂක පරිපාලනය, ආරක්‍ෂක කළමනාකරණය, මෙහෙයුම් සැලසුම් කිරීම, සම්පත් කළමනාකරණය, සැපයුම් ක්‍රියාවලිය, සයිබර් ආරක්‍ෂාව, මානව සම්පත් අධීක්‍ෂණය සහ වෘත්තීය හමුදා අධ්‍යාපනය ඇතුළු පුළුල් පරාසයක විසිරුණු ක්ෂේත්‍ර ගණනාවක් ඔස්සේ කරුණු ඉදිරිපත් කරනු ලැබීය. විශේෂයෙන් පුළුල් හා ශක්තිමත් වෘත්තීමය අධ්‍යාපන පදනමක් ගොඩනැගීම, පවත්වා ගැනීම සහ හැකියාවන් ශක්තිමත් කිරීමට ඒ සඳහා සුවිශේෂී වන අධ්‍යාපනික සහ වෘත්තීය සංවර්ධන වැඩසටහන්වල කාර්යභාරය පිළිබඳ එක්සත් ජනපද දුත පිරිස අවධාරණය කළහ.
ශ්‍රී ලංකාවේ ආරක්‍ෂක අංශ ශක්තිමත් කිරීම සඳහා, විශේෂයෙන් වෘත්තීයභාවය, ආයතනික කාර්යක්‍ෂමතාව සහ මානව සම්පත් සංවර්ධනය දියුණු කිරීමේදී ජාත්‍යන්තර සහයක කණ්ඩායම (ISG) ඉටු කළ කාර්යභාරය නියෝජ්‍ය අමාත්‍යවරයා සහ ආරක්‍ෂක ලේකම්වරයා යන දෙදෙනාම අගය කළහ. ගැඹුරු, දිගුකාලීන හවුල්කාරිත්වයන් සඳහා ශක්තිමත් පදනමක් ස්ථාපිත කර ඇති ශ්‍රී ලංකාවේ ආරක්‍ෂක ප්‍රමුඛතා සහ තීරණ ගැනීමේ ක්‍රියාවලීන් පිළිබඳ අවබෝධය ISG නියෝජිතයන් මෙම අවස්ථාවන්හි ලබාගන්නා ලදි.
ඇමරිකානු දුත පිරිසට කලාපීය ව්‍යාපෘති ප්‍රධානී Michael Charles Rembold මහතා සහ ශ්‍රී ලංකාවේ ව්‍යාපෘති සම්බන්ධීකාරක Matt Ashley මහතා ඇතුළත් වූහ. ශ්‍රී ලංකාවේ ඇමරිකා එක්සත් ජනපද තානාපති කාර්යාලයේ සහකාර ආරක්‍ෂක උපදේශක Seth Nevis ඇතුළු එක්සත් ජනපද තානාපති කාර්යාලයේ නිලධාරීන්, ආරක්‍ෂක සහයෝගිතා ප්‍රධානී කාර්යාලයේ ලුතිනන් කමාන්ඩර් Ros Larry ද, ඔවුන් සමඟ එක් වූහ.
මෙම සාකච්ඡාවේදී ISG නියෝජිත පිරිස සහ ශ්‍රී ලාංකික නියෝජිතයින් අතර සහයෝගීතාව වර්ධනය කෙරුණු අතර, විශ්වාසය සහ අන්‍යෝන්‍ය අවබෝධයද වර්ධනය විය.
