රසායනික තර්ජන අවම කිරීම පිළිබඳ දැනුවත් කිරීමේ වැඩසටහනක් පැවත්වේ

රසායනික අවි සම්මුතිය ක්‍රියාත්මක කිරීමේ ජාතික අධිකාරිය (NACWC) විසින් “Clean Sri Lanka” සංකල්පය යටතේ අද (අගෝස්තු 28) දින ආරක්‍ෂක අමාත්‍යාංශයේ නන්දිමිත්‍ර ශ්‍රවණාගාරයේදී විවිධ අමාත්‍යාංශ සහ දෙපාර්තමේන්තු වල ජ්‍යෙෂ්ඨ සහ මධ්‍යම මට්ටමේ නිලධාරීන් 90 දෙනෙකුගේ සහභාගීත්වයෙන් රසායනික තර්ජන අවම කිරීම පිළිබඳ අන්තර් අමාත්‍යාංශ දැනුවත් කිරීමේ වැඩසටහනක් සාර්ථකව පවත්වන ලදි.

මෙම වැඩසටහනේ අරමුණ වූයේ ජාතික හා ජාත්‍යන්තර බැඳීම්වලට අනුකූලව NACWC විසින් අනුගමනය කරන අවදානම අවම කිරීමේ ප්‍රවේශයන් ඉස්මතු කරමින් රසායනික තර්ජන හා සම්බන්ධ විය හැකි අවදානම් පිළිබඳව රජයේ නිලධාරීන් දැනුවත් කිරීමයි. තවද, පිරිසිදු ශ්‍රී ලංකා මුලපිරීම්වල සමාජීය හා පාරිසරික කුළුණු කෙරෙහි අවධානය යොමු කරන ලදි. සැසිවාර අතරතුර, සම්පත් දායකයින් විසින් ගෘහස්ථ රසායනික ද්‍රව්‍ය ආරක්‍ෂිත භාවිතය, රසායනික තර්ජනවල ජාතික තලයේ බලපෑම සහ ස්වභාවය, අවදානම් අවම කිරීම සඳහා වැළැක්වීමේ පියවර සහ ප්‍රතිචාර යාන්ත්‍රණ, අමාත්‍යාංශ අතර සූදානම, සම්බන්ධීකරණය සහ තොරතුරු බෙදා ගැනීමේ වැදගත්කම යනාදි කරුණු පිළිබඳ අවබෝධයක් ලබා දුන්හ.

තවදුරටත් මෙම වැඩසටහන මගින් රසායනික තර්ජන ඵලදායී ලෙස වැළැක්වීම, හඳුනා ගැනීම සහ ඒවාට ප්‍රතිචාර දැක්වීම සඳහා ශක්තිමත් අන්තර්-අමාත්‍යාංශ සහයෝගීතාවයක අවශ්‍යතාවය ද අවධාරණය කල අතර, අවම කිරීමේ ප්‍රවේශයන් ක්‍රියාත්මක කිරීමේදී සහ ජාතික ඔරොත්තු දීමේ හැකියාව ශක්තිමත් කිරීමේදී NACWC සමඟ හවුල්කාරිත්වයෙන් කටයුතු කිරීමට සහභාගිවන්නන් දිරිමත් කරන ලදි.

මෙම මුලපිරීම මගින් සහයෝගීතාවය, දැනුම බෙදාගැනීම සහ ක්‍රියාකාරී පියවරයන් තුළින් රසායනික ද්‍රව්‍ය ආශ්‍රිත අවදානම් වලට මුහුණදීම සඳහා ශ්‍රී ලංකාව හොඳින් සූදානම් බව සහතික කිරීම සඳහා NACWC හි කැපවීම මනාව පිළිබිඹු වේ.