ජාතික ආපදා කළමනාකරණ කමිටුව ජනපති ප්‍රධානත්වයෙන් ආරක්‍ෂක අමාත්‍යාංශයේදී රැස්වේ
නොවැම්බර් 28, 2025දිවයිනට බලපා ඇති අයහපත් කාලගුණික තත්ත්වය හේතුවෙන් ජාතික ආපදා කළමනාකරණ කමිටුව ගරු ජනාධිපති අනුර කුමාර දිසානායක මැතිතුමාගේ ප්‍රධානත්වයෙන් ඊයේ (නොවැම්බර් 27) රාත්‍රියේ ආරක්‍ෂක අමාත්‍යාංශයේදී රැස්විය.
අයහපත් කාලගුණය හේතුවෙන් රට තුළ උද්ගත වී ඇති හදිසි ආපදා තත්ත්වය හමුවේ ගත යුතු ඉදිරි ක්‍රියාමාර්ග පිළිබඳව පුළුල්ව විමසා බැලීම මෙහිදී සිදු කෙරුණු අතර, ගරු ජනාධිපති අනුර කුමාර දිසානායක මැතිතුමා විසින් ජනතාවගේ ජීවිත ආරක්‍ෂාව සහ සහන සේවා කටයුතු අඛණ්ඩව සැලසීම සඳහා ගත හැකි ක්‍රියාමාර්ග පිළිබඳ මෙහිදී අදාළ බලධාරීන් සමග පුළුල් ලෙස සාකච්ඡාවක නිරත විය. එම සහන සේවා ක්‍රියාමාර්ග කඩිනමින් ගන්නා ලෙසත්, අවශ්‍ය ප්‍රතිපාදන කඩිනමින් ලබා දෙන ලෙසත්, අදාළ බලධාරීන් වෙත උපදෙස් ලබා දෙන ලදි.
එමෙන්ම, වාරිමාර්ග පද්ධතියේ ආරක්‍ෂාව වෙනුවෙන් ගත යුතු පියවර පිළිබඳව අදාළ බලධාරීන් සමග සාකච්ඡා කළ අතර, ඇතිවිය හැකි තත්ත්වයන් මඟ හරවා ගැනීම සඳහා කඩිනමින් පියවර ගන්නා ලෙසද, ජනාධිපතිවරයා මෙම අවස්ථාවේ උපදෙස් ලබා දෙන ලදි.
සුළි කුණාටුවේ බලපෑම හේතුවෙන් නැගෙනහිර වෙරළ තීරයේ ඇති විය හැකි තත්ත්වය පිළිබඳවද මෙහිදී විශේෂ අවධානය යොමු වූ අතර, හදිසි ආපදා තත්ත්වය හේතුවෙන් සිදු වූ නිවාස සහ වගා හානි සඳහා වන්දි ලබාදීමේ කටයුතු සැලසුම් කරන ලෙසද, ජනාධිපතිවරයා මෙහිදී ආපදා කළමනාකරණ මධ්‍යස්ථානයේ සහ වාරිමාර්ග දෙපාර්තමේන්තුවේ නිලධාරින්ට උපදෙස් ලබා දෙන ලදී.
පවතින අයහපත් කාලගුණය හේතුවෙන් නිරන්තරයෙන් සිදුවන කාලගුණික වෙනස්වීම්, ආපදා තත්වයන් සහ අවදානම් සහිත ප්‍රදේශ පිළිබඳව යාවත්කාලීන තොරතුරු පිළිබඳ නිරන්තරයෙන් ජනතාව දැනුවත් කිරීමට කටයුතු සිදු කරන ලෙස කාලගුණ විද්‍යා දෙපාර්තමේන්තුවේ ප්‍රධානීන් වෙතද, ජනාධිපතිවරයා උපදෙස් දුන්නේය.
ඕනෑම අවස්ථාවක සහන සේවා කටයුතු සිදුකිරීම සඳහා ත්‍රවිධ හමුදාව සූදානමින් සිටින බව හා මේ වන විටත් සෑම ප්‍රදේශයකම වාගේ ත්‍රිවිධ හමුදා සාමාජිකයින් සක්‍රීය දායකත්වය ලබාදෙමින් සිටින බව ආරක්‍ෂක ලේකම්වරයා මෙම අවස්ථාවේ සඳහන් කර සිටින ලදි.
අග්‍රාමාත්‍ය ආචාර්ය හරිනි අමරසූරිය, විපක්‍ෂ නායක සජිත් ප්‍රේමදාස, වරාය සහ සිවිල් ගුවන් සේවා අමාත්‍ය අනුර කරුණාතිලක, නිවාස, ඉදිකිරීම් සහ ජල සම්පාදන අමාත්‍ය සුසිල් රණසිංහ, ජනාධිපති ලේකම් ආචාර්ය නන්දික සනත් කුමානායක යන මහත්වරුද, ත්‍රිවිධ හමුදාපතිවරුන් ඇතුළු ආරක්‍ෂක අංශ ජ්‍යෙෂ්ඨ නිලධාරීහු, කාලගුණ විද්‍යා දෙපාර්තමේන්තුව, වාරිමාර්ග දෙපාර්තමේන්තුව, මහවැලි අධිකාරිය ඇතුළු අදාළ ආයතන නියෝජනය කරමින් අධ්‍යක්‍ෂ ජනරාල්වරු ඇතුළු ජ්‍යෙෂ්ඨ නිලධාරීන් පිරිසක් මෙම අවස්ථාවට එක්වන ලදී.
