தேசிய அனர்த்த முகாமைத்துவ குழு ஜனாதிபதியின் தலைமையில் பாதுகாப்பு அமைச்சில் கூடியது

நாட்டைப் பாதித்துள்ள மோசமான காலநிலையினால் ஏற்பட்ட அவசர நிலைமையை ஆராயும் பொருட்டு தேசிய அனர்த்த முகாமைத்துவ குழு நேற்று மாலை (நவம்பர் 27) பாதுகாப்பு அமைச்சில் ஜனாதிபதி அனுர குமார திசாநாயக்கவின் தலைமையில் கூடியது.

இந்தக் கூட்டத்தில், அனர்த்த நிலைமையை மதிப்பிடுவது மற்றும் மனித உயிர்களைப் பாதுகாப்பதற்கும், தடையின்றி நிவாரண முயற்சிகளைப் மேற்கொள்வதற்கும் தேவையான உடனடி நடவடிக்கைகளை அடையாளம் காண்பது குறித்தும் கவனம் செலுத்தப்பட்டது.

அத்தியாவசிய நிவாரண சேவைகளை தொடர்ந்து வழங்குவதை உறுதி செய்வதற்காக, நடவடிக்கைகளை விரைவுபடுத்துவதற்கும், தேவையான வளங்களை விரைவாக ஒதுக்குவதற்கும் அறிவுறுத்தல்களை வழங்குவதற்காக, ஜனாதிபதி அநுர குமார திசாநாயக்க சம்பந்தப்பட்ட அதிகாரிகளுடன் விரிவான கலந்துரையாடல்களை நடத்தினார்.

நாட்டின் நீர்ப்பாசன வலையமைப்புகளை பாதுகாப்பது குறித்தும் ஜனாதிபதி விரிவான கலந்துரையாடல்களில் ஈடுபட்டார்.

அத்துடன் அதிக ஆபத்துள்ள சூழ்நிலைகளைத் தடுக்க உடனடி நடவடிக்கை எடுக்குமாறு அதிகாரிகளை கேட்டுக் கொண்டார்.

கிழக்கு கடற்கரையோரத்தில் நிலவும் நிலைமை குறித்து விஷேட கவனம் செலுத்தப்பட்டது, அங்கு நிலவும் புயல் சூழ்நிலைகளால் ஏற்படக்கூடிய பாதிப்புகள் மதிப்பாய்வு செய்யப்பட்டன. மேலும், தொடர்ச்சியான மோசமான காலநிலை காரணமாக சேதமடைந்த வீடுகள் மற்றும் விவசாய நிலங்களுக்கு இழப்பீட்டு செலுத்துவது தொடர்பில் திட்டமிடுமாறு ஜனாதிபதி திசாநாயக்க அனர்த்த நிவாரண நிலையம் மற்றும் நீர்ப்பாசனத் திணைக்களத்திற்கு அறிவுறுத்தல்களை வழங்கினார்.

காலநிலை மாற்றங்கள், அனர்த்த அபாயங்கள் மற்றும் பாதிக்கப்படக்கூடிய பகுதிகள் குறித்து பொதுமக்களுக்கு தொடர்ச்சியான தகவல்களை வழங்குமாறு வானிலை ஆராய்ச்சி நிலையத்திற்கு அவர் மேலும் உத்தரவிட்டார்.

பாதுகாப்புச் செயலாளர் விளக்கமளிகையில், எந்த நேரத்திலும் நிவாரணப் பணிகளை மேற்கொள்ள முப்படைகளும் பூரண தயார் நிலையில் இருப்பதாகவும், பல பிராந்தியங்களில் பாதிக்கப்பட்ட சமூகங்களுக்கு ஏற்கனவே துரிதமாக உதவி வருவதாகவும் கூறினார்.

இந்தக் கூட்டத்தில் பிரதமர் கலாநிதி ஹரிணி அமரசூரிய, எதிர்க்கட்சித் தலைவர் சஜித் பிரேமதாச, துறைமுகங்கள் மற்றும் சிவில் விமானப் போக்குவரத்து அமைச்சர் அனுர கருணாதிலக்க, வீட்டுவசதி, நிர்மாணம் மற்றும் நீர் வழங்கல் அமைச்சர் சுசில் ரணசிங்க, ஜனாதிபதியின் செயலாளர் கலாநிதி நந்திக சனத் குமநாயக்க ஆகியோர் கலந்து கொண்டனர்.

முப்படைத் தளபதிகள், அனர்த்த முகாமைத்துவ நிலையம், நீர்ப்பாசனத் திணைக்களம், வானிலை ஆராய்ச்சி நிலையம், மகாவலி அதிகார சபை மற்றும் ஏனைய முக்கிய நிறுவனங்களின் சிரேஷ்ட அதிகாரிகளும் கலந்து கொண்டனர்.

இந்த உயர்மட்டக் கலந்துரையாடல், அபாயங்களைக் குறைத்தல், உயிர்களைப் பாதுகாத்தல் மற்றும் பாதிக்கப்பட்ட சமூகங்களுக்கு விரைவான உதவி கிடைபப்தை உறுதி செய்தல் ஆகியவற்றை நோக்கமாகக் கொண்ட ஒருங்கிணைந்த தேசிய நடவடிக்கைக்கான அரசாங்கத்தின் உறுதிப்பாட்டை மீண்டும் உறுதிப்படுத்தியது என்பது குறிப்பிடத்தக்கது.