ශ්‍රී ලංකා නාවික හමුදාව ආපදා සහන කණ්ඩායම් යෙදවීම

අයහපත් කාලගුණ තත්ත්වය හේතුවෙන් ආපදාවට පත්ව සිටින ජනතාවට සහන සැලසීමේ අරමුණින්, ශ්‍රී ලංකා නාවික හමුදාව විසින් ආපදා සහන කණ්ඩායම් 141ක් සූදානම් කර තිබේ. 2025 නොවැම්බර් මස 29 වන දින උදෑසන 0730 වන විට, එම කණ්ඩායම් අතුරින් කණ්ඩායම් 79ක් දිවයින පුරා සියලුම පළාත් ආවරණය වන පරිදි සක්‍රීය මෙහෙයුම් සඳහා යොදවා තිබේ. නොවැම්බර් 22 වන දින සහන මෙහෙයුම් ආරම්භ කළ දින සිට මේ දක්වා ආපදාවට පත් වූ පුද්ගලයින් 900 කට අධික සංඛ්‍යාවක් නිරුපද්‍රිතව මුදාගැනීමටත්, පුද්ගලයින් 2000ක් පමණ ආරක්‍ෂිතව නාවික හමුදා යාත්‍රා මඟින් ප්‍රවාහනය කිරීමටත්, නාවික හමුදාව සමත් වී ඇත.

ඊයේ (නොවැම්බර් 28) දින කලාඔය ප්‍රදේශයේ ගංවතුරට හසු වී, සිර වී තිබූ බස් රථයක ආපදාවට පත් පුද්ගලයින් මුදාගැනීමේ මෙහෙයුමක් ආරම්භ කරන ලදී. ඒ සඳහා නාවික හමුදා කණ්ඩායම් දෙකක් (02) යොදවන ලද නමුත්, අධික වර්ෂාව සහ වේගයෙන් ඉහළ යන ගංවතුර තත්ත්වය හේතුවෙන් මුදාගැනීමේ කටයුතු අසීරු විය. මුලින් නාවික හමුදාව මෙහෙයුම ආරම්භ කළ අතර, පසුව ශ්‍රී ලංකා ගුවන් හමුදාවේ බෙල් 212 හෙලිකොප්ටර් යානා මඟින් ගුවන් මෙහෙයුමක් උත්සාහ කළ ද, එය ද අසාර්ථක විය. කෙසේ වෙතත්, ඊයේ රාත්‍රියේදී නාවික හමුදාව විසින් විශේෂ මුදාගැනීමේ මෙහෙයුමක් නැවත ආරම්භ කරන ලදි.

අද උදෑසන 0800 වන විට මෙම විශේෂ මෙහෙයුම සාර්ථක වී ඇති අතර, කුඩා යාත්‍රා භාවිතා කරමින් විදේශීය කාන්තාවක් ඇතුළු පුද්ගලයින් 25 දෙනෙකු නිරුපද්‍රිතව මුදාගැනීමට නාවික හමුදා භටපිරිස් සමත් වී තිබේ. ආපදාවට පත් ජනතාවට සහන සැලසීම සඳහා නාවික හමුදාව සියලු සම්පත් යොදවමින් කැපවීමෙන් කටයුතු කරන අතර, මුදාගැනීමේ මෙහෙයුම් මේ වන විටත් අඛණ්ඩව ක්‍රියාත්මක වේ.