ශ්‍රී ලංකාව සහ සෞදි අරාබිය ආරක්‍ෂක සබඳතා තවදුරටත් ශක්තිමත්
කිරීමට ඇති කැපවීම යළිත් තහවුරු කරයි

සෞදි අරාබියේ රියාද් නුවර පිහිටි එරට ආරක්‍ෂක අමාත්‍යාංශයේදී පැවැත්වූ ඉහළ මට්ටමේ ද්විපාර්ශ්වික සාකච්ඡාවකින් අනතුරුව, ශ්‍රී ලංකාව සහ සෞදි අරාබි රාජධානිය අතර ආරක්‍ෂක සබඳතා තවදුරටත් ශක්තිමත් කිරීමට ඇති කැපවීම යළිත් තහවුරු කර තිබේ.
  
පසුගිය සතියේ (පෙබරවාරි 09) පැවති මෙම හමුව සඳහා ශ්‍රී ලංකා ආරක්‍ෂක නියෝජ්‍ය අමාත්‍ය මේජර් ජෙනරල් අරුණ ජයසේකර (විශ්‍රාමික) සහ සෞදි අරාබි රාජධානියේ ජාතික ආරක්‍ෂක නියෝජ්‍ය අමාත්‍ය ආචාර්ය Nasser bin Abdulaziz Al-Dawood සහභාගී වූහ. මෙම හමුව සිදු වූයේ නියෝජ්‍ය අමාත්‍යවරයා “ලෝක ආරක්‍ෂක ප්‍රදර්ශනය 2026" සඳහා සහභාගී වීමට එරට සිදුකල නිල සංචාරය අතරතුරදීය. මෙම සංවාදය අතරතුර දෙරට අතර අන්‍යොන්‍ය අවබෝධය ඉහළ නැංවීම සහ ආරක්‍ෂක අංශයේ අනාගත සහයෝගීතාව ශක්තිමත් කිරීම සඳහා ගතහැකි ඉදිරි ක්‍රියාමාර්ග කෙරෙහි අවධානය යොමු විය.  

සාකච්ඡාව අතරතුරදී, දෙරට අතර දීර්ඝ කාලයක සිට පවතින උණුසුම් හා මිත්‍රශීලී ද්විපාර්ශ්වික සබඳතා පිළිබඳව මේජර් ජෙනරල් ජයසේකර සිය අවංක කෘතඥතාව පළ කළේය. මෙම දීර්ඝකාලීන හවුල්කාරිත්වය තවදුරටත් තහවුරු කිරීමේ අරමුණින්, පොදු අවශ්‍යතා සහිත ක්ෂේත්‍රයන් හිදී සෞදි අරාබි රාජධානියේ අඛණ්ඩ සහයෝගය අපේක්‍ෂා කරන බව ශ්‍රී ලංකා නියෝජිතයන් විසින් කරුණු දක්වන ලදී.

සාගර කලාපීය ආරක්‍ෂාව (Maritime Security) ඉහළ නැංවීම සම්බන්ධයෙන් මෙහිදී විශේෂ අවධානයක් යොමු කරන ලදී. විශේෂයෙන් මත්ද්‍රව්‍ය ජාවාරම සහ නීතිවිරෝධී ජාවාරම් කටයුතු මගින් එල්ල වන තර්ජන කෙරෙහි අවධානය යොමු කරමින්, කලාපය තුළ මතුවෙමින් පවතින ආරක්‍ෂාව අභියෝග පිළිබඳව දෙපාර්ශවයම ගැඹුරින් අදහස් හුවමාරු කර ගත්හ. මෙම අන්තර්ජාතික අපරාධවලට ඵලදායී ලෙස මුහුණ දීම සඳහා සම්බන්ධීකරණය ඉහළ නැංවීමේ හදිසි අවශ්‍යතාව ද ඔවුහු අවධාරණය කළහ.  

මතුවෙමින් පවතින ආරක්‍ෂක ප්‍රවණතා සහ මූලධර්ම පිළිබඳව ද මෙහිදී සාකච්ඡා කෙරිණි. එසේම, වර්තමාන ආරක්‍ෂක උපාය මාර්ග, විකාශනය වන කලාපීය සහ ගෝලීය ආරක්‍ෂක ගතිකතාවයන් සහ නවීන ආරක්‍ෂක සංකල්ප පිළිබඳව ද ඔවුන් අදහස් හුවමාරු කරගත් අතර, එමඟින් වෙනස් වන ආරක්‍ෂක වටපිටාව පිළිබඳව පොදු අවබෝධයක් ඇති කර ගැනීමට උත්සාහ කරන ලදී.

අනාගතය මනාව විශ්ලේෂණය කරමින්, දෙරටේ ආයතනික සබඳතා තවදුරටත් ගැඹුරු කිරීම සඳහා දෙපාර්ශවයම දැඩි උනන්දුවක් පළ කළහ. ව්‍යුහගත ආරක්‍ෂක සාකච්ඡා සහ මාණ්ඩලික සාකච්ඡා ඇතුළුව අනාගත ද්විපාර්ශ්වික ආරක්‍ෂක කටයුතු සංවිධානය කිරීමේ හැකියාව පිළිබඳව ද මෙහිදී කරුණු සොයා බලන ලදී. මීට අමතරව, අනාගත සහයෝගීතාවයේ ප්‍රධාන කුළුණක් ලෙස ධාරිතා වර්ධන වැඩසටහන් ස්ථාපිත කිරීම සහ පුහුණු අවස්ථා ඉහළ නැංවීමේ හැකියාව පිළිබඳව ද සාකච්ඡාවට ලක් විය.  

අන්‍යොන්‍ය වශයෙන් දෙරටේම අභිවෘද්ධිය සඳහා ආරක්‍ෂක සහයෝගීතාව තවදුරටත් ශක්තිමත් කිරීමට ඇති කැපවීම නියෝජ්‍ය අමාත්‍ය මේජර් ජෙනරල් ජයසේකර සහ ආචාර්ය Nasser bin Abdulaziz Al-Dawood විසින් යළිත් තහවුරු කරමින් සාකච්ඡාව ඉතා සාර්ථක ලෙස අවසන් විය.