60 වන මාලදිවයින් ජාතික දින සැමරුම් උත්සවයට
ආරක්‍ෂක ලේකම්වරයා සහභාගී වේ
ජුලි 23, 2025
මාලදිවයින් ජනරජයේ 60 වන ජාතික දින සැමරුම් උත්සවය ඊයේ (ජූලි 22) දින කොළඹ සිනමන් ලයිෆ් - සිටි ඔෆ් ඩ්‍රීම්ස් හෝටල් පරිශ්‍රයේදී අති උත්කර්ෂවත් අයුරින් පවත්වනු ලැබූ අතර, ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) ද විශේෂ ආරාධිතයකු ලෙස මෙම උත්සවයට සහභාගී විය.
ශ්‍රී ලංකාවේ මාලදිවයින් තානාපති ගරු Masood Imad මැතිතුමා විසින් උත්සවයට පැමිණි සම්භාවනීය අමුත්තන්, රාජ්‍ය තාන්ත්‍රිකයින් සහ ආරාධිත අමුත්තන් උණුසුම් අයුරින් පිළිගනු ලැබීය.
වෙළඳ, වාණිජ, ආහාර සුරක්‍ෂිතතා සහ සමුපකාර සංවර්ධන අමාත්‍ය ගරු වසන්ත සමරසිංහ මැතිතුමා උත්සවයේ ප්‍රධාන ආරාධිත අමුත්තා ලෙස සහභාගී වූයේය.
ශ්‍රී ලංකාවේ මාලදිවයින් මහ කොමසාරිස් කාර්යාලය විසින් සංවිධානය කර තිබූ මෙම සැමරුම් උත්සවය, ශ්‍රී ලංකා - මාලදිවයින් රාජ්‍යතාන්ත්‍රික සබඳතා ශක්තිමත් කිරීමේ වැදගත් සන්ධිස්ථානයක් සනිටුහන් කරන අතර, එය මාලදිවයින් ජනරජයේ ජාතික දිනය සැමරීම පමණක් නොව, ශ්‍රී ලංකාව සහ මාලදිවයින අතර පවතින දිගුකාලීන සමාජීය අන්තර් සබඳතාවන් මෙන්ම, සංස්කෘතික උරුමයන්ගේ වැදගත්කම ඉස්මතු කරනු ලැබීය.
රාජ්‍ය නිලධාරීන්, රාජ්‍යතාන්ත්‍රික නිලධාරීන්, ත්‍රිවිධ හමුදා ජ්‍යෙෂ්ඨ නිලධාරීන් මෙන්ම, විවිධ ආයතන නියෝජනය කරමින් ආරාධිත අමුත්තන් රැසක් මෙම අවස්ථාවට එක්ව සිටියහ.
