ඉන්දුනීසියානු 80 වැනි නිදහස් දින සැමරුමට ආරක්‍ෂක නියෝජ්‍ය අමාත්‍යවරයා සහ ආරක්‍ෂක ලේකම්වරයා සහභාගී වේ
අගෝස්තු 28, 2025ආරක්‍ෂක නියෝජ්‍ය අමාත්‍ය මේජර් ජෙනරල් අරුණ ජයසේකර (විශ්‍රාමික) සහ ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) පසුගිය බදාදා (අගෝ 27) දින කොළඹ 7, හෝර්ටන් පෙදෙසේ ඉන්දුනීසියානු තානාපති නිළ නිවසේ පැවති 80 වන ඉන්දුනීසියානු ජනරජයේ නිදහස් දින සැමැරුමට සහභාගී වූහ.
ඉන්දුනීසියානු තානාපති ගරු Dewi Gustina Tobing මැතිණිය විසින් මෙම උත්සව අවස්ථාවට සපැමිණි සම්භාවනීය අමුත්තන් උණුසුම් අයුරින් පිළිගනු ලැබු අතර, ග්‍රාමීය සංවර්ධන, සමාජ ආරක්‍ෂණ සහ ප්‍රජා සවිබල ගැන්වීමේ අමාත්‍ය ගරු (ආචාර්ය) උපාලි පන්නිලගේ මහතා උත්සවයේ ප්‍රධාන ආරාධිත අමුත්තා ලෙස මෙම අවස්ථාවට සහභාගී විය.
ශ්‍රී ලංකාව සහ ඉන්දුනීසියාව අතර දීර්ඝකාලීන මිත්‍රත්වය හා ආරක්‍ෂක සහයෝගිතාව නැවත ශක්තිමත් කරමින්, නියෝජ්‍ය ආරක්‍ෂක අමාත්‍යවරයා සහ ආරක්‍ෂක ලේකම්වරයා මෙම උත්සව අවස්ථාවේදී ඉන්දුනීසියානු තානාපතිවරයාට හා එරට ජනතාවට උණුසුම් සුභ පැතුම් එක් කළහ.
මෙම අවස්ථාවට හිටපු ජනාධිපතිවරු, අමාත්‍යවරු, රාජ්‍ය තාන්ත්‍රික නිලධාරීන්, ජ්‍යෙෂ්ඨ හමුදා නිලධාරීන් සහ සම්භාවනීය අමුත්තන් රැසක් සහභාගී වූහ.
