බදුල්ල දිස්ත්‍රික් ආපදා කළමනාකරණ කමිටුව ආරක්‍ෂක නියෝජ්‍ය අමාත්‍ය, මේජර් ජෙනරාල් අරුණ ජයසේකර (විශ්‍රාමික) ගේ ප්‍රධානත්වයෙන්
නොවැම්බර් 28, 2025අයහපත් කාලගුණ තත්ත්වයන් හේතුවෙන් රට බරපතල ව්‍යසනයකට ලක්වෙමින් පවතින අතර, බදුල්ල දිස්ත්‍රික්කය ද එම ව්‍යසනයේ කොටසක් බවට පත්ව තිබේ. පවත්නා තත්ත්වය කළමනාකරණය කිරීම සඳහා කඩිනම් හා ඉහළ පෙළේ දේශපාලන හා පරිපාලන නිලධාරීන් සම්බන්ධ වු බදුල්ල දිස්ත්‍රික් ආපදා කළමනාකරණ කමිටුව ඊයේ රාත්‍රි 0730 ට (නොවැම්බර් 27) බදුල්ල දිස්ත්‍රික් ලේකම් කාර්යාලයේදී රැස්වීය. එහිදී ආපදා අවම කිරීම, සහන සැපයීම සහ ආපදාවට ලක් වූවන් කඩිනමින් ඉවත් කර ගැනීම පිළිබඳ පුළුල්ව සාකච්ඡා කරන ලදි.
එම රැස්වීම ආරක්‍ෂක නියෝජ්‍ය අමාත්‍ය, මේජර් ජෙනරාල් (විශ්‍රාමික) අරුණ ජයසේකර, වැවිලි හා ප්‍රජා යටිතල පහසුකම් අමාත්‍ය ගරු සමන්ත විද්‍යාරත්න සහ තරුණ කටයුතු නියෝජ්‍ය අමාත්‍ය ගරු දිනඳු සමන් කුමාර යන අමාත්‍යවරුන්ගේ සම සභාපතිත්වයෙන් පැවැත් වූහ.
අතිශය තීරණාත්මක වූ මෙම හමුව, දිස්ත්‍රික්කයේ සියලුම දේශපාලන හා පරිපාලන පාර්ශ්වකරුවන්ගේ ඒකමතික ප්‍රවේශය විදහා පෙන්වූ අතර, එහිදී ඉහළම මට්ටමේ නියෝජනයක් දක්නට ලැබිණි. ගරු ඌව පළාත් ආණ්ඩුකාරතුමා, බදුල්ල දිස්ත්‍රික්කයේ ගරු පාර්ලිමේන්තු මන්ත්‍රීවරුන් වන අම්බිකා සමිවෙල්, රවින්ද්‍ර බණ්ඩාර සුදත් බලගල්ල යන මහත්ම මහත්මීන්, දිස්ත්‍රික් ලේකම් ඇතුළු බදුල්ල ආපදා කළමනාකරණ මධ්‍යස්ථානයේ ජ්‍යෙෂ්ඨ නිලධාරීන්, ත්‍රිවිධ හමුදාවේ ජ්‍යෙෂ්ඨ නිලධාරීන්, ප්‍රාදේශීය ලේකම්වරුන්, ජ්‍යෙෂ්ඨ පොලිස් නිලධාරීන් සහ අදාළ මෙහෙයුම් කාර්යාල නියෝජනය කරන රාජ්‍ය නිලධාරීහු විශාල පිරිසක් සහභාගී වී සිටියහ.
මෙම හදිසි සැසිවාරයේදී, බදුල්ල දිස්ත්‍රික්කයේ පවතින ආපදා කළමනාකරණ තත්ත්වය පිළිබඳව නිලධාරීන් විසින් පුළුල් ලෙස සාකච්ඡා කළ අතර, එම අර්බුදයන්ට ක්ෂණිකව මුහුණදීම සහ පවතින ගංවතුර හා නායයෑම් තර්ජනය පාලනය කිරීම සඳහා අවශ්‍ය පූර්වෝපාය කෙරෙහි අවධානය යොමු කෙරිණි. මෙහිදී, ඉහළ අවදානම් කලාපවලින් විපතට පත් පුද්ගලයන් ඉවත් කිරීමේ කටයුතු සම්බන්ධයෙන් විශේෂ අවධානයක් යොමු වූ අතර, ආරක්‍ෂක අංශ වෙත ඒ සම්බන්ධයෙන් උපදෙස් ලබා දෙන ලදි.
