இலங்கை விமானப்படையின் 75ஆம் ஆண்டு பதக்கம் வழங்கும் விழாவில் பாதுகாப்பு பிரதி அமைச்சர் மற்றும் பாதுகாப்பு செயலாளர் கலந்து சிறப்பித்தனர்

இலங்கை விமானப்படையின் 75ஆம் ஆண்டு நிறைவை முன்னிட்டு, இன்று (3 மார்ச்) இலங்கை விமானப்படை தலைமையகத்தில் பதக்கம் வழங்கும் விழா ஒன்று நடைபெற்றது.

இந்நிகழ்வில் பிரதம அதிதியாக பாதுகாப்பு பிரதி அமைச்சர் மேஜர் ஜெனரல் அருண ஜயசேகர (ஓய்வு) கலந்து சிறப்பித்தார். பாதுகாப்பு செயலாளர் எயார் வைஸ் மார்ஷல் சம்பத் தூயகொந்தாவும் (ஓய்வு) இவ்விழாவில் பங்கேற்றார்.

நாட்டின் இறையாண்மையும் ஒருமைப்பாடையும் பாதுகாக்க அர்ப்பணிப்புடன் சேவை செய்த இலங்கை விமானப்படை பணியாளர்களின் சிறப்பான சேவை, அர்ப்பணிப்பு மற்றும் தியாகங்களை இந்நிகழ்வு போற்றியது. சிறப்பான செயல்திறன், வீரம் மற்றும் நீண்டகால சேவையை பாராட்டும் வகையில் பல அதிகாரிகள் மற்றும் ஏனைய தர நிலையினருக்கு பதக்கங்கள் வழங்கப்பட்டன.

இங்கு உரையாற்றிய பிரதி அமைச்சர், தேசிய பாதுகாப்பு, அனர்த்த நிவாரண நடவடிக்கைகள் மற்றும் மனிதாபிமான உதவி பணிகளில் இலங்கை விமானப்படை வழங்கி வரும் உறுதியான பங்களிப்பை பாராட்டினார். சவாலான காலங்களில் நாட்டை பாதுகாப்பதுடன், தேசிய அபிவிருத்தி முயற்சிகளுக்கும் விமானப்படை வழங்கும் ஆதரவை அவர் எடுத்துரைத்தார்.

பாதுகாப்பு செயலாளரும் விமானப்படை பணியாளர்களின் தொழில்முறைத் திறன் மற்றும் தொடர்ந்து வழங்கி வரும் அர்ப்பணிப்பை பாராட்டியதுடன், 75 ஆண்டு நிறைவு என்பது நிறுவனத்தின் தாங்கும் திறன், முன்னேற்றம் மற்றும் சேவைச் சிறப்பின் சான்றாகும் எனக் குறிப்பிட்டார்.

இலங்கை விமானப்படை தனது பெருமைமிக்க பாரம்பரியத்தை வெளிப்படுத்தும் இராணுவ மரியாதை நிகழ்வுகளுடன், நாட்டிற்கு சேவை செய்யும் புதிய அத்தியாயத்தை நோக்கி முன்னேறுவதை குறிக்கும் வகையில் விழா நிறைவுற்றது.